ग्रामपंचायत कार्यालय बदद्ल माहिती

सर्वतीर्थ

टाकेद येथे प्रभू रामचंद्रांनी जमिनीत एक बाण मारला आणि त्यातून निर्माण झालेले पाणी जटायूला पाजले. ते प्यायल्यावर जटायूने आपले प्राण रामाच्या मांडीवरच सोडले. रामायणातली ही जटायूची कथा ज्या ठिकाणी घडली असे सांगितले जाते ते स्थान म्हणजे नाशिक जिल्ह्यामधील टाकेद तीर्थ होय. येथे पक्षीरूपातील जटायूसुद्धा देवत्व प्रगट करून गेला. इथेच जटायूच्या मृत्यूनंतर श्रीरामांनी त्याचे अंत्यसंस्कार केले व आपल्या पित्याचे व जटायूचे श्राद्ध तर्पण केले. याच ठिकाणी लक्ष्मणाने सीतेच्या रक्षणासाठी लक्ष्मणरेषा आखली होती असे म्हणतात.‘लक्ष्मण रेखा’ या नावाचे एकमेव मंदिर नाशिक येथील पंचवटी येथे आहे. नाशिकपासून इगतपुरी घोटीमार्गे टाकेदचे अंतर ४८ किमी आहे. रामायणातील जटायूमुळे टाकेद तीर्थ पावन झाले. नाशिकपासून जवळच असलेले हे ठिकाण. तिथे उभारलेली जटायूची मोठी मूर्ती अतिशय आकर्षक असून एक देखणे मंदिरही उभारले आहे. गेल्या काही वर्षांत सर्वतीर्थ टाकेद या स्थानाचे अतिशय आकर्षक पर्यटन केंद्रात रूपांतर करण्यात आले आहे. जटायूची भव्य मूर्ती हे इथले प्रमुख आकर्षण असून ज्या ठिकाणी रामचंद्रांनी बाण मारल्यानंतर पाणी निघाले तिथे आता एक कुंड बांधण्यात आले आहे. त्याला सर्वतीर्थ असे म्हणतात. आड-औंढा-पट्टा-बितिंगा या दुर्गम अशा किल्ल्यांनी व्यापलेला हा सारा प्रदेश आहे. इथेच वसले आहे टाकेद तीर्थ. भंडारदरा इथूनसुद्धा हे अंतर ४५ किलोमीटर इतके आहे. हा संपूर्ण परिसर हिरवाईने नटलेला असल्याने वर्षभर असंख्य पर्यटक या स्थानाला भेट देतात.